O centenario de Celso Emilio reclama a súa condición de poeta popular

Feb 21, 2012 editor de CEF novas

O escritor de Celanova aínda conserva con orgullo o recoñecemento popular cen anos despois de nacer.

 

CAMILO FRANCO   santiago / la voz  18 de febrero de 2012

Celso Emilio Ferreiro volverá ás rúas ao longo de 2012. Rúas, casas, escaparates e escenarios serán, ademais dos académicos, espazos de celebración para un escritor que aínda conserva con orgullo o recoñecemento popular cen anos despois de nacer en Celanova.

Un conxunto de institucións culturais galegas presentaron as liñas xerais das conmemoracións que lembrarán este centenario, poñendo de manifesto o procedemento de cooperación para a organización das actividades e a vixencia absoluta da figura e da obra de Celso Emilio Ferreiro e das súas reivindicacións.

Ata oito institucións presentaron este arranque do centenario ferreiriano. Ademais de Cultura, a Real Academia, o Consello da Cultura, o Concello de Celanova, o Pen Clube de Galicia, Política Lingüística, e a fundación que leva o nome do autor de Longa noite de pedra aportarán distintas actividades para conformar un calendario que non deixe fóra ningunha das facetas do escritor e que ligue co carácter universal que o autor ten.

Entre as primeiras iniciativas que xa están en marcha cóntase a páxina web celsoemilioferreiro.org, que, segundo o seu fillo, Luís Ferreiro, «recolle toda a información segmentada nas súas etapas vitais, incluíndo material gráfico». Nesta web tamén se ofrecerá información sobre todas as actividades deste centenario e do cincuentenario da edición de Longa noite de pedra.

Entre as actividades anunciadas figura unha iniciativa de ler versos do escritor en casas de rúas de Galicia que leven o nome de escritor, unha iniciativa á que poden sumarse os veciños que o desexen en cada unha das poboacións. No mesmo sentido, versos e textos de Ferreiro están presentes xa en escaparates de comercios de Celanova e en espazos públicos da vila.

 

Artigos relacionados


Inauguración da “Biblioteca Moraima” no Colexio “Celso Emilio Ferreiro” de Coia (Vigo)
Espranza, poema de Celso Emilio cantado polo grupo “Tiro na Testa”
Celso Emilio Ferreiro en Bangladesh