O 17 de Abril foi presentada na Deputación de Ourense, a edición bilingüe, galego-castelán, de Longa noite de pedra de AUGA EDITORA. O acto contou coa presenza do Presidente da Deputación José Manuel Baltar, o editor do libro Xosé A. Perozo, o Alcalde de Celanova e deputado responsable de cultura na Deputación, Antonio Mouriño e de Luis Ferreiro, Director da Fundación Celso Emilio Ferreiro.
Celebrouse hoxe na Cidade da Cultura un acto de recoñecemento á figura de Celso Emilio Ferreiro con grande éxito de público. Participaron Luís Ferreiro, Ramón Nicolás e o grupo Labregos no tempo dos Sputniks. Presentou o acto Marcos Lorenzo e abriu o ciclo de conferencias “Galicia, ceo das letras” Anxo Lorenzo.
O Circo Lírico do País dos Ananos xorde da fusión dun recital poético cun espectáculo circense. Unha pista na que a poesía xera números musicais, monicreques, visións extraordinarias e moito humor, na presenza dun público moi participativo. Dirixido por María Lado abre xa o periódo de contratación.
A velada do Circo Lírico do País dos Ananos presenta música en directo da man do grupo Labregos do tempo dos Sputniks -formado por García de Dios Ke Te Crew, o Leo i Arremecághona, mais Silverio Outeiro ex Xenreira- números de marionetas de fío e sombras chinesas con Borxa Ínsua xunto á voz das poetisas María Lado e Lucía Aldao. Complétase o elenco coa participación dun reducido número de poetas locais, convidados a participar na pista, con textos propios ou alleos, nun arriscado número con feras devoradoras de vates. O público tamén ten moito que dicir, pois, cal circo romano, eles poderán salvar ou pedir a cabeza dos artistas presentes.
O ano de 2012 vén marcado, no noso mundo cultural, por dous aniversarios intimamente relacionados: por unha banda, o centenario do nacemento de Celso Emilio Ferreiro (1912); pola outra, cúmprense 50 anos da publicación da que sería a súa obra máis emblemática, Longa noite de pedra. Estas dúas efemérides permítennos afonda tanto na figura do escritor celanovés como nas páxinas do seu poemario; é por isto que, dentro das nosas accións, se atopa a celebración das Xornadas de homenaxe a Celso Emilio Ferreiro.
Estas xornadas terán lugar, como as do ano pasado, na Facultade de Filoloxía da USC, os vindeiros 11 e 12 de abril. Podedes atopar toda a información sobre o programa e como matricularse -están recoñecidas cun crédito de libre configuración para todas as titulacións da Universidade de Santiago de Compostela- no blogue que vimos de habilitar para o acto: http://homenaxecef.blogaliza.org. (vía http://ligaestudantilgalega.info/xornadas-de-homenaxe-a-celso-emilio-ferreiro/)
O venres 13 de abril de 2012, ás 20:00 horas, no Auditorio Municipal Ilduara de Celanova terá lugar un Concerto-Homenaxe a Celso Emilio.