O novo xornal dixital en lingua galega, Dioivo, estréase incluíndo unha entrevista, realizada por Carlos Meixide, a Aser Álvarez, cabezaleiro da Asociación Arraianos e responsable do Monográfico Celso Emilio Ferreiro fai 100 anos. Deixamos aquí unha ligazón á entrevista e desexamos longa vida á nova plataforma informativa.

No interesante blogue Writing Finger, Jason Preater ofreceu, hai algúns meses, a tradución de tres poemas de Celso Emilio Ferreiro ao inglés. Velaquí a súa versión de  ”Longa noite de pedra”:

Long Night of Stone

In my path there is a stone
I have a stone in the middle of the path
I have a stone
In the middle of the path I have a stone.
(Carlos Drummond de Andrade)

The roof is of stone
Of stone are the walls
And the shadows
Of stone the ground
And the bars.
The doors,
The chains,
The air,
The windows,
The looks,
Are of stone.
The hearts of men
Who wait far off
Are made
Also
Of stone
And I am dying
In this long night
Of stone.

Presentamos o Logo do Ano Celso Emilio.

Hai escritores que pola dimensión da súa vida e a súa obra, vixente malia o que veña, teñen unha especial relación coa información de hoxe e o seu novo contexto por excelencia: o contexto dixital. É o caso de autores como Celso Emilio Ferreiro, que, tal e como sinalamos dende Código Cero, tense diversificado en múltiples ríos a través da Rede: nun certame de fotografía cos móbiles, nunha fotobiografía sonora da man de Ouvirmos, ou a través de eventos musicais en liña como Cantalingua. Pois ben, este luns amencimos con novidades dixitais arredor do lendario escritor de Celanova. Para comezar, a web celsoemilioferreiro.org, espazo de difusión que se presentou a semana pasada en Santiago e que se insire nas accións que celebran o centenario do poeta.
A páxina en cuestión foi desenvolvida por Ouvirmos para a fundación que leva o nome do autor de Longa Noite de Pedra e a Consellería de Cultura. Trátase dun sitio en tres linguas (galego, castelán e inglés) proxectado e posto en marcha para “axudar a difundir a figura deste grande poeta dentro e fóra de Galicia”, sinala Ouvirmos. A páxina é en toda regra unha fonte de información sobre o autor galego, pero tamén sobre o coñecemento que se xera a raíz del e sobre o amplo calendario de celebracións que xiraran arredor de Celso Emilio co gallo do centenario do seu nacemento. O sitio web, engade Ouvirmos, fai un rigoroso e pormenorizado percorrido pola vida e obra de Celso Emilio, todo artellado arredor das diferentes etapas vitais que pasou en Celanova, Asturias, Pontevedra, Vigo, Caracas e Madrid.
Na web pódese coñecer tamén a súa creación literaria. No apartado bibliográfico está recollida a súa obra desde os primeiros poemas de Cartafol de Poesía até o póstumo O libro dos homenaxes, así como unha listaxe de bibliografía sobre Celso Emilio Ferreiro.
Outro apartado innovador, engade Ouvirmos, é o Arquivo, onde se recollen fotografías e arquivos sonoros que nos aproximan máis á figura do poeta. “Entre as fotos do álbum familiar”, explícase, “podemos ver imaxes dos seus primeiros anos en Celanova, do seu noivado con Moraima, dos seus anos en Pontevedra e Vigo, da súa amizade cos intelectuais da época, da emigración en Venezuela, e dos últimos anos en Madrid”. Amais do devandito achégase unha Fonoteca que dá acubillo a unha escolma de arquivos sonoros nos que se pode escoitar a voz do propio autor recitando ou o son da súa máquina de escribir, amais de interpretacións musicais da súa obra.
Mostra multimedia

De xeito paralelo ao desenvolvemento da páxina web e outras iniciativas de celebración, anúnciase a posta en marcha dunha mostra multimedia sobre Celso Emilio que vai ter carácter itinerante, durante 2012, e que abranguerá unha boa parte da nosa xeografía. A exposición, que entre outras cousas incluirá contidos visuais e máis obxectos físicos que pertenceron ao autor, vén da man da Fundación Celso Emilio Ferreiro e das secretarías xerais de Cultura e Política Lingüística. Segundo informan, trátase de por ao alcance de tódalas galegas e galegos unha biografía multimedia a través da obra, as imaxes, os sons e os obxectos propios do escritor, amais da súa voz, estruturándose todo arredor dunha pantalla de acceso táctil a aplicacións interactivas e dunha mesa de luz con obxectos persoais do poeta.

Manuel Bragado, director de Edicións Xerais e patrono da Fundación Celso Emilio Ferreiro, deixa no seu blogue brétemas algunhas reflexións ao fío dos actos celebrados en Compostela no que se presentou un amplo programa de actividades institucionais para o Centenario e engade as primeiras valoracións arredor da biografía sobre Celso Emilio Ferreiro que verá a luz nun breve prazo de tempo. Velaquí o seu texto:

Estamos de cheo no ano de Celso Emilio Ferreiro. Pola mañá acompañei a Luís Ferreiro, o director da Fundación CEF, ao acto de presentación da programación institucional do ano Ferreiro, na que colaboran coa Fundación a Xunta, a RAG, o CCG e o concello de Celanova (mágoa que non o faga tamén o concello de Vigo, a cidade onde viviu tantos anos e onde viviu o poeta), así como outras entidades privadas como as editorais Xerais, Ouvirmos, Kalandraka e Tambre, asociacións como o Pen Clube Galicia, centros educativos, asociacións culturais de todo o país. Pola noite iniciei a lectura do orixinal da biografía de Ramón Nicolás no que comprobei decontado, xa nos capítulos dedicados á infancia e á mocidade do poeta en Celanova, que virá preñada de importantes novidades. Un relato diacrónico ben artellado, fiado transversalmente en cada unha das etapas polas dimensións persoal, política e literaria do biografado e do seu entorno; unha prosa literaria de festa e unha documentación completísima, que sostén cada unha das interpretacións e non dificulta unha lectura enguedellante, foron, tras catro horas de lectura, as miñas primeiras valoracións. Aventuro que tanto pola súa extensión (vinte e catro capítulos e numerosos apéndices, máis de 600 páxinas) como pola súa fasquía de biografía literaria, esta de Ramón Nicolás será a obra de referencia do centenario Ferreiro.