ENOGASTROFONÍAS FERREIRIANAS VIGO.
Arraianos propón un espectáculo con música, poesía e cociña en directo que nos convida a un percorrido estimulante e sensorial pola vida e a obra de Celso Emilio Ferreiro, da man dos enogastrophones… o domingo, 1 de xullo ás 21 horas na Feira do Libro de Vigo (na Alameda).
27 de Xuño do 2012
Escritores e músicos compartiron escenario na noite de onte no Teatro Novacaixagalicia de Vigo, para homenaxear a Celso Emilio, con motivo do primeiro centenario do seu nacemento.
O acto foi presentado pola poeta Yolanda Castaño e os versos do autor de Celanova soaron nas voces de Rexina Vega, Inma López Silva, Manoel Soto e Fernando Franco, sendo ademais musicados por artistas de moi variado estilo como El Puto Coke, Ataque Escampe, Patricia Moon e Frans Banfield, Davide, Xesús Alonso Montero e Luis Emilio Batallán, a Coral de Beade e alumnos da Escola Superior de Arte Dramática e do IES Álvaro Cunqueiro.
Unha das actuacions máis emotiva foi a do catedrático Xesús Alonso Montero, que cantou dous poemas de Celso Emilio, pertencentes ao libro “Cantos de la nueva resistencia española”.
27 Xuño do 2012
Vivo na rúa Celso Emilio Ferreiro.
A campaña Vivo na rúa Celso Emilio Ferreiro consiste nunha acción de buzoneo masivo dun completo folleto sobre o poeta, que se distribúe nas 28 localidades galegas que contan cunha rúa dedicada a Celso Emilio. O obxectivo é que os cidadáns tomen conciencia de quen era o celanovés, do valor da súa obra e que desde ese achegamento á figura do poeta, sintan o orgullo de vivir na rúa que leva o seu nome.
Ouvirmos deseña e produce esta campaña para a Xunta de Galicia dentro dos actos do centenario. Hoxe, 27 de xuño, distribúese na provincia de Lugo: en Lugo capital, Sarria, Monforte de Lemos, O Saviñao, Viveiro e Burela. Nesta última localidade preséntase aos medios de comunicación a distribución da campaña Vivo na rúa Celso Emilio Ferreiro na provincia. Farémolo cun acto diferente, onde estudantes, comerciantes, inmigrantes, etc. participarán recitando na rúa os versos de Celso Emilio.
Podedes ver e descargar o folleto completo en:
http://ouvirmos.com/web/wp-content/uploads/2012/04/F-BUZONEO-AnoCEF.pdf
O próximo sábado día 30 de Xuño, na Feira do libro de Vigo, terá lugar a presentación do libro Dun tempo e dunha terra, antoloxía poética de Celso Emilio Ferreiro. Será as 19:00 e estarán no acto Luis Ferreiro Loredo (Director da Fundación Celso Emilio Ferreiro), Gonzalo Navaza ( o autor da selección dos textos) , Ignacio Chao ( editor de Edelvives) e David Pintor (Ilustrador do libro).
O 9 de xuño do 2012 colocouse unha placa conmemorativa do Centenario do nacemento de Celso Emilio Ferreiro, na rúa Curros Enríquez, 25 de Celanova. Nesta casa naceu Celso Emilio no ano 1912, e nela viviu até a súa marcha a Pontevedra no ano 1940.