Edicións Xerais de Galicia anuncia a inminente aparición da biografía de Celso Emilio Ferreiro, a cargo do crítico literario e profesor Ramón Nicolás, baixo o tìtulo de Onde o mundo se chama Celso Emilio Ferreiro. Acompáñase a cuberta.
No Auditorio Municipal Ilduara de Celanova, terá lugar o luns 16/7/2012 a partires das 20.00 horas, un recital poético-musical adicado a Celso Emilio Ferreiro. Con esta actividade pechase o ciclo Galicia Clasiccs, da Axencia Galega das Industrias Culturais (Agadic). O recital, que leva por título Onde o mundo se chama Celanova,de Curros a Celso Emilio, foi ideado con motivo da conmemoración do Centenario de Celso Emilio Ferreiro e contará coa participación da Compañía Lírica Ofelia Nieto e do Grupo Internacional Cítola,que serán os encargados de interpretar as dúas obras compostas a partires dos poemas de Celso Emilio, ‘Moraima’ e ‘Longa noite de pedra’.
Foron 1.284 alumnos de 35 centros escolares os que durante o primeiro semestre deste ano participaron no xogo literario “Cen poemas en Celanova”. A actividade consistía en localizar nos escaparates da vila as estrofas do coñecido poema “Longa noite de pedra”. Coa axuda dun plano de Celanova coa localización dos poemas, os estudantes tiveron a oportunidade de facer unha visita creativa e divertida pola vila ourensá e pola poesía de Celso Emilio, ao tempo que interactuaban co medio e coa xente.
Esta iniciativa forma parte do conxunto de actividades organizadas para a conmemoración do Ano Celso Emilio Ferreiro.
(Información vía La Región)
O escritor de orixe ourensá Celso Emilio Ferreiro foi homenaxeado onte en
Madrid polo centenario do seu nacemento, nun acto poético musical que tivo lugar
na Casa de Galicia. Autoridades locais e galegas, persoeiros da cultura,
familiares, amigos e numerosas persoas interesadas tamén na figura do poeta
participaron neste acto de celebración do Ano Celso Emilio Ferreiro, promovido
pola Xunta de Galicia a través da Consellería de Cultura, Educación e Ordenación
Universitaria.
Durante o acto, o conselleiro de Cultura e Educación, Xesús Vázquez Abad,
destacou o vínculo do escritor con Madrid durante a súa última etapa creativa.
‘En Madrid -dixo-, o poeta encontrou foros onde expresar a súa humanidade e o
seu talento, e tribunas desde onde darlle unha parte do seu impulso final á
construción da Galicia que hoxe coñecemos’. ‘Por iso a homenaxe que hoxe traemos
á Casa de Galicia é tamén un acto de gratitude con esta cidade que vén ofrecendo
na súa historia miles de oportunidades humanas’, dixo o conselleiro.
LUGAR DE ACOLLIDA
Madrid foi para Celso Emilio o lugar de acollida na súa última etapa vital, onde viviu a partir
de 1973 na rúa Juan Bravo. Alí logrou difundir tamén en castelán a súa obra
poética e comezou a darlles forma ás vivencias traídas de Venezuela, onde tamén
medrou como escritor. No Ateneo de Madrid dirixiu a Aula de Cultura Galega,
traballou como crítico literario en ABC e escribiu no xornal Arriba. Tamén
redactou en Madrid páxinas de tanta autenticidade como as recollidas na súa
novela breve A taberna do Galo.
Segundo asegurou o conselleiro de Educación, Xesús Vázquez Abad na homenaxe,
‘os seus anos finais, de extraordinaria madureza intelectual e de asentamento da bagaxe dunha vida
intensa, encontraron en Madrid o clima humano que necesitaba para pechar un
ciclo, relativamente breve no tempo, pero cargado de vivencias importantes, para
el e para a nosa forma de asumir a galeguidade’. Madrid tamén foi o lugar da
multitudinaria homenaxe que lle foi tributada o 3 de novembro de 1979, tras a
súa morte, no Pazo dos Deportes.
Vázquez Abad presidiu o acto de homenaxe acompañado polo secretario xeral de Cultura, Anxo Lorenzo; polo director da Casa
de Galicia en Madrid, José Ramón Ónega; polo director da Fundación Celso Emilio
Ferreiro, Luís Ferreiro; polo concelleiro presidente do distrito de
Moncloa-Aravaca en Madrid, Álvaro Ballarín; e polo membro da xunta directiva do
Ateneo de Madrid Miguel Pastrana, que participaron na lectura de poemas do
escritor. Tamén se sumaron ao recitado poético o escritor Carlos Reigosa, o
meteorólogo de Televisión Española Martín Barreiro, o alcalde de Celanova
Antonio Mouriño, a profesora de galego en Madrid, Carme Lamela e alumnado de
galego en Madrid, con poemas como ‘Moraima’, ‘Eu en ti’, ‘Tempo de chorar’ ou
‘Deitado frente ao mar’. Os versos de Celso Emilio Ferreiro tamén se recordaron
onte en Madrid a través da voz do cantautor Amancio Prada, que ofreceu unha
actuación musical para pechar o acto de homenaxe.
Pequeno Merlín
INFANTIL E XUVENIL
Cando se cumpren os cen anos do seu nacemento, O meu primeiro Celso Emilio é unha homenaxe sentida a unha persoa –o escritor Celso Emilio Ferreiro- que, mesmo por riba da súa evidente e recoñecida valía literaria, estivo en todo momento coa xente e a xente foi canda el, levando sempre Galicia e a nosa lingua no corazón. Este libro reúne unha biografía, unha antoloxía poética e oito poemas musicados e cantados.